കണ്ണൂർ ജില്ലയിലെ നാല് പാലങ്ങൾ ഇന്ന് മന്ത്രി പി എ മുഹമ്മദ് റിയാസ് നാടിന് സമർപ്പിക്കും

● കണ്ണൂർ : ജില്ലയിലെ നാല് പാലങ്ങൾ ചൊവ്വാഴ്ച പൊതുമരാമത്ത് മന്ത്രി പി എ മുഹമ്മദ് റിയാസ് നാടിന് സമർപ്പിക്കും. കൊട്ടിയൂർ ബാവലിപ്പുഴയിൽ പുനർനിർമിച്ച നീണ്ടുനോക്കി--കൊട്ടിയൂർ പാലം രാവിലെ 10ന് ഉദ്ഘാടനംചെയ്യും. കിഫ്ബി ധനസഹായത്തോടെ 8.06 കോടി രൂപ ചെലവിൽ നിർമിച്ച മട്ടന്നൂർ മണ്ഡലത്തിലെ വട്ടോളി പാലത്തിന്റെയും 2023-24 ബജറ്റിൽ ഉൾപ്പെടുത്തി 3.7 കോടി രൂപ ചെലവിൽ നിർമിച്ച ചിറ്റാരിപ്പറമ്പ്--വട്ടോളി കോയ്യാറ്റിൽ മെക്കാഡം റോഡിന്റെയും ഉദ്ഘാടനം പകൽ 11.30ന് നിർവഹിക്കും. 

മട്ടന്നൂർ നഗരസഭയെയും മാങ്ങാട്ടിടം പഞ്ചായത്തിനെയും ബന്ധിപ്പിക്കുന്ന കൂളിക്കടവ് പാലം വൈകിട്ട് നാലിന് ഉദ് ഘാടനംചെയ്യും. കെ കെ ശൈലജ എംഎൽഎ അധ്യക്ഷയാകും. തൃപ്പങ്ങോട്ടൂർ, കുന്നോത്തുപറമ്പ് പഞ്ചായത്തുകളെ ബന്ധിപ്പിക്കുന്ന പുതുക്കിപ്പണിത പത്തായക്കല്ല് പാലം വൈകീട്ട് അഞ്ചിന് നാടിന് സമർപ്പിക്കും. കെ പി മോഹനൻ എംഎൽഎ അധ്യക്ഷനാകും. വീതികുറഞ്ഞ പഴയ പാലം പൊളിച്ചുമാറ്റി അതേ സ്ഥലത്താണ് പുതിയപാലം നിർമിച്ചത്. 

2.28 കോടി രൂപ ചെലവിൽ നിർമിച്ച പാലത്തിന് 21.20 മീറ്റർ നീളമുണ്ട്. ഇരുഭാഗങ്ങളിലും 1.50 മീറ്റർ വീതിയുള്ള നടപ്പാതയുൾപ്പെടെ 11 മീറ്ററാണ് വീതി. പാലത്തിൻ്റെ അടിത്തറയ്ക്ക് പൈൽ ഫൗണ്ടേഷനാണ് നൽകിയിട്ടുള്ളത്. പാലത്തിൻ്റെ ഇരുവശത്തും 100 മീറ്റർ നീളത്തിൽ അനുബന്ധ റോഡുകളും കോൺക്രീറ്റ് പാർശ്വഭിത്തിയും ഡ്രെയ്നേജും റോഡ് സുരക്ഷാ ക്രമീകരണങ്ങളും ഒരുക്കി.